Sch'in onn nov cumenza èn els puspè qua – ils buns propiests. Far dapli sport ni mangiar pli sanadaivel èn propiests classics. Tuttina èsi mintga giada grev da tener en quai ch'ins ha prendì avant.
Tenor in studi da perscrutaders da la Gronda Britannia san 88% da las persunas betg tener en ils propiests. Gia suenter trais mais vegn la mesadad ad emblidar lur propiest.
La psichologia da l'uman
Jürgen Margraf, professer da psichologia a l'universitad Bochum, ha sa fatschentà cun il tema propiests. El declera il fenomen uschia: L'uman vul avair la controlla da sia vita. Cun far propiests sa senta el bain e crai d'avair sut controlla sia vita – tuttina sch'el cuntanscha ses propiests u betg. Unic la cretta saja impurtanta, di Margraf.
In di cun qualitad magica
Vinavant è Jürgen Margraf persvadì, ch'il emprim di da l'onn nov munta insatge spezial. Cunquai ch'igl è l'emprim di da l'onn crai la glieud ch'igl vegn a gartegiar meglier – quasi suenter il patratg: In onn nov – ina nova pussaivladad.
RR actualitad 08:10