L’uschenumnà ePortal metta a disposiziun a la populaziun sco er a l’economia ina via simpla e segira per nizzegiar parts da ses servetschs, scriva il chantun en ina communicaziun. Per tscherts servetschs fai da basegn da crear in conto d’utilisader. Cun quel è era collià in stgaffa da brevs digitala, e d'avrir il conto è gratuit. Tscherts servetschs vegnan dentant, tuttina sco ozendi, a custar.
Link tar la purschida dal chantun
Durant ils emprims mais dal servetsch saja il formular per spustar il termin per inoltrar la declaraziun da taglia vegnì nizzegià il pli savens, scriva il chantun. Passa 22'000 dumondas sajan vegnidas inoltradas. Actualmain èn 25 servetschs a disposiziun sin il portal da di e da notg.
Las pussaivladads duain crescher
Bleras da las prestaziuns ch’il chantun offrescha, vegnian ozendi anc liquidadas cun agid da documents sin palpiri. Quai duai sa midar pass per pass. E l’augment da la spierta digitala vegnia examinada sin eventualas foras da segirezza. Quai tras experts per la segirezza digitala interns sco era externs, hai num en la communicaziun.
Cun l’ePortal cuntinuescha il chantun sia strategia «Administraziun digitala Grischun 2024-2028». Quella strategia cumpiglia 31 mesiras che duain accelerar la transfurmaziun digitala ils proxims onns. Quai munta er ina collavuraziun pli stretga cun las vischnancas.
Intelligenza artifiziala per l'administrativa chantunala
Per chattar ora, nua che las tecnologias da l'interlligenza artifiziala pon vegnir applitgadas en moda raschunaivla, laschan ils chantuns Grischun, Son Gagl, Turgovia, Appenzell Dadens, Appenzell Dadora ed il Principadi da Liechtenstein far in'analisa dal potenzial cuminaivla. Actualmain vegnia examinà, nua ed en tge dimensiun che la IA possia porscher ina plivalur, scriva il chantun. Mo soluziuns che pon vegnir applitgadas cun responsabladad e che servan al bainstar general vegnan silsuenter examinadas pli detagliadamain. Ils resultats duain gidar a sviluppar vinavant ils process administrativs ed a meglierar sistematicamain ils servetschs a favur da la populaziun e da l'economia.
Supplementarmain a l'analisa interchantunala dal potenzial vegnan realisads projects da pilot en l'administraziun chantunala dal Grischun per obtegnair experientschas davart il diever e davart la realisaziun tecnica da tecnologias da la IA. In grond giavisch da l'administraziun chantunala èsi d'accumpagnar las collavuraturas ed ils collavuraturs ad emprender ed a trair a niz l'intelligenza artifiziala generativa. Novas purschidas da furmaziun supplementara ed in mussavia sensibiliseschan per in tractament segir e cun responsabladad.