L'atun 2019 èn ils emprims «Fairdinands» stà en acziun. En connex cun la campagna «Fairtrail» dal chantun s'entaupan bikers e viandants. Uschia declera per exempel Roland Kolb sco guid da velo da muntogna sia vista e Stefan Moser sco guid da viandar. Uschia duain las duas partidas vegnidas sensibilisadas per in l'auter.
Tuts dus èn da l'entschatta part da la campagna e tiran in facit positiv. Els discurran schizunt da respect e chapientscha per ils basegns e la situaziun da l'autra vart. In grond agid per sa far attent saja la stgellina vi dal velo.
Nursas nairas
Er schi la bilantscha è positiva suenter trais onns campagna saja da dir che nursas nairas vegnì adina a dar. Cun entrar en dialog e chapientscha vicendaivla saja dentant ina convivenza tranter bikers e viandants sin las sendas grischunas adina pussaivla. Il feedback che Roland Kolb e Stefan Moser survegnan cura ch'els èn sin via sco «Fairdinands» è uschia savens che la purschida grischuna fiss er in model per auters chantuns.