Il favrer èn stadas 1’882 persunas senza lavur en il Grischun. Quai èn passa 230 pli pauc ch'il schaner e correspunda ad ina quota da dischoccupaziun dad 1,7 %. Quai communitgescha l'Uffizi per industria, mastergn e lavur dal Grischun.
Lavur curta minimala
Il favrer han 5 manaschis cun 42 lavurants pertutgads introducì lavur curta. Il mais avant eran quai anc 4 manaschis cun 30 lavurants. Pia è la lavur curta s'augmentada levamain. Guardà sur tut è la lavur reducida dentant anc adina minimala.
Era damain dischoccupads en Svizra
Il favrer è la quota da dischoccupaziun en Svizra sa reducida per 0,1% sin 3,6% cumpareglià cun il mais avant. La reducziun da 3.6% correspunda a bunamain 160’000 dischoccupads, communitgescha l’Uffizi federal da statistica. Cumpareglià cun il favrer 2016 è il dumber sa reducì per 1’600 persunas.
Bler meglier era il favrer la situaziun tar ils giuvens dischoccupads (15 fin 24 onns). Lur cifra è sa sbassada - cumpareglià cun il mais avant - per 3,4% sin 19'108. Cumpareglià cun il favrer 2016 correspunda quai ad in regress da 6,7%.
RR novitads 08:00