Siglir tar il cuntegn

Grischun Ina buna stad per il turissem dal Grischun

L'emprima mesadad da la stagiun da stad è passada ed ils hoteliers èn cuntents. Els quintan er per la secunda mesadad cun bunas cifras da pernottaziuns.

Natira intacta sco en Val Mingèr tira er la stad blers turists en il Grischun.
Legenda: Val Mingèr Natira intacta sco en Val Mingèr e bell'aura tira er la stad turists en il Grischun. MAD

La statistica exacta na datti anc betg per la stagiun da stad 2016, dentant Ernst Wyrsch, president da hotelleriesuisse Grischun, ha anc udì naginas reclamaziuns enfin uss. E sche l'aura stettia stabila, saja franc e segir er la segunda mesadad da la stagiun da stad buna.

Sin fundament da las cudeschaziuns na possian ins dentant anc dir nagut, perquai ch'il turist da stad cudeschescha plitost a curta vista. Vitiers vegnia anc in auter factur: «Ins na dastga strusch dir quai, dentant il turissem grischun profitescha er da la situaziun malsegira politica en l'Europa», di Wyrsch.

Cun attentats ed attatgas en Frantscha, en Tirchia ed en Germania creschia er il desideri dal turist suenter ruaus e segirezza. Ed il desideri da betg esser memia dalunsch dal dachasa. Perquai fetschian blers Svizzers er vacanzas en Svizra.

Stad mediocra per las pendicularas

Per las pendicularas dal Grischun saja quai pli grev da far ina bilantscha senza las cifras concretas, di il president da las pendicularas dal Grischun, Silvio Schmid. En general possian ins dentant dir, che la svieuta da las pendicularas è la stad circa 5 u 6% da la svieuta da l'enviern. Ed er quella stagiun para enfin uss a Schmid dad esser ina stagiun mediocra pertutgant frequenzas da pendicularas.

RR actualitad 07:00