La chasa ad Alvagni ha cumenzà a brischar mardi suentermezdi. La Polizia chantunala dal Grischun saja vegnida alarmada curt suenter las 15:00, ch'i dettia ferm fim sut il tetg da la chasa, scriva la polizia. Cura ch'ils pumpiers d'Alvra èn arrivads ha il surchombras gia brischà cumplettamain. Ils pumpiers han fatg il pussaivel per evitar che las flommas sa derasian sin las chasas vischinas ed ina stalla. Duas equipas dals pumpiers da Surses han sustegnì ils pumpiers d'Alvra cun differents vehichels. Vi da la chasa da trais auzadas hai dà gronds donns. Pertge che la chasa ha cumenzà a brischar n'è anc betg enconuschent.
Fieu sut controlla la saira
Enturn las 19:00 han ils pumpiers gì stizzà il fieu. Fin mesemna bunura han pumpiers fatg guardia.
In'equipa dal Salvamant Grischun Central è stada al lieu per garantir eventual agid medicinal. Sch'igl ha dà blessads n'ha la polizia betg communitgà.
La Polizia chantunala dal Grischun examinescha pertge ch'il surchombras da la chasa ad Alvagni ha cumenzà a brischar.