Era sche la maioritad da las persunas dovran chandailas dad LED datti tenor l'assicuranza d’edifizis dal Grischun anc adina mintg’onn enturn 5 fin 20 incendis pervia da chandailas. Il post da consultaziun svizzer per la prevenziun d’accidents (BfU) va da quai ora ch’anc 15% da tuttas persunas dovran chandailas convenziunalas per il pignol.
Marco Sgier è manader da la partiziun da prevenziun da fieu tar l'Assicuranza d’edifizis dal Grischun. El fa attent che tgi che dovra chandailas convenziunalas, stoppia esser pli precaut. Ils blers incendis schabegian numnadamain pervi da malprecauziun.
Las chandailas na duessan betg tutgar il lain
Sch’ins na vul betg desister da chandailas èsi da mirar ch’ellas na tutgan betg il lain cura ch’ins envida ellas, plinavant èsi da midar ellas baud avunda per ch’ellas n'ardian betg giu cumplettamain.
En il cas da fieu pon ins l'emprim mument sa gidar cun ina tuaglia da stizzar, cun ina sadella aua u cun in stizzafieu. Sche la flomma daventa in fieu pli grond èsi da bandunar la stiva. Cun il fim sa derasa lura era in fim toxic. En mintga cas èsi d’alarmar ils pumpiers sin la numera 118. Sch’ins vegn da stizzar il fieu avant ch’ils pumpiers arrivan, lura na ston ins betg pajar schegea ch’els èn vegnids per nagut.
RTR Co e cum 11:15