Las preparaziuns per ils Special Olympics World Winter Games 2029 sajan cumplexas e pretendian ina stretga collavuraziun cun partenaris naziunals ed internaziunals, di Beat Ritschard. El è il secretari general dal comité d'organisaziun da l'eveniment da sport. Perquai haja el era gia surpiglià ses post l'entschatta dal 2024. D'avair temp saja impurtant per in'occurrenza cun ina tala grondezza. Durant ils proxims quatter onns possia anc dar intginas situaziuns nunspetgadas, darar giaja tut sco da baiver aua, di il commember da l'unitad operativa. Ed els veglian esser preparads per tut.
Actualmain saja il comité anc pitschen, ma l'organisaziun planiseschia d'occupar fin l'entschatta dal 2027 fin 80 plazzas per realisar l'occurrenza cun success. Ma era quai na bastia betg, manegia Beat Ritschard.
I dovra ils clubs da sport locals che collavuran e sa gidan. Qua avain nus dentant enfin ussa survegnì signals fitg positivs.
E betg mo il comité e las uniuns localas èn dumandadas: Er radund 3'000 voluntarias e voluntaris per di vegnia a duvrar – e quai durant set dis.
Inclusiun
La finamira centrala dals gieus è quella da crear in'occurrenza inclusiva che na sa differenziescha betg d'autras occurrenzas grondas en il sport e d'engrondir la chapientscha per persunas cun in impediment spiertal era en il mintgadi.
Ch'i na dat naginas retegnientschas, ch'ins n'ha betg tema, ch'ins sa fatschenta cun ils umans cun impediments spiertals, s'avischina in a l'auter – quai è mia speranza.
Quai pretenda er soluziuns finanzialas per render pli pajabla la participaziun a las commembras ed als commembers da la famiglia dals atlets.
Sfidas
Las sfidas sajan las medemas sco tar tut las autras occurrenzas sportivas da tala grondezza: Il budget – i vegn fatg quint cun 55 milliuns francs, 30 da quels duain vegnir pajads dal maun public e da chattar localitads pajablas ed adattadas.
Cun las aspectativas da muventar mintga di enturn 13'000 persunas, vegnia tenor Beat Ritschard era il transport ad esser in'ulteriura difficultad. Ma el saja da buna speranza da dumagnar questas sfidas e da realisar cun success ils gieus.
