La regenza grischuna propona al Cussegl grond da refusar l'incumbensa dal deputà Alessandro Della Vedova. El ha vulì che las duas minoritads linguisticas, rumantsch e talian, hajan mintgamai segir in sez en la regenza grischuna. La regenza è da l'avis ch'i saja en emprima lingia pensum da las partidas e gruppaziuns da procurar entras candidatas e candidats per ina buna represchentaziun da las gruppas socialas en il Grischun. Er il suveran haja la finala in pled en chaussa, cura ch'i giaja per eleger quest gremi.
Alessandro Della Vedova aveva en sia incumbensa prendì ils chantuns Berna e Vallais sco exempels, nua che regiuns u linguas han in sez segir en la regenza. Tar Berna è quai il Giura bernais che survegn segir in dals set sezs, en il Vallais è mintgamai in commember da la regenza dal Vallais Sura, Vallais Central e dal Vallais Sut. Ils ulteriurs dus commembers u commembras da la regenza pon esser da l'entir chantun.
La regenza grischuna è da l'opiniun ch'ins na possia dentant betg cumparegliar quai. En il Giura Bernais ed en il Vallais saja la part che discurria tudestg u franzos pli gronda, cumpareglià cun il Rumantsch e Talian en il Grischun.