La plattafurma cun num «Porta Cultura» duai render pli accessibel e visibel la purschida culturala dal chantun. Il term «cultura» è vegnì definì fitg vast – uschia cuntegna la plattafurma infurmaziuns da museums ed archivs sur artisanadi ed istorgia fin tar nums da lieus, chanzuns popularas ed uniuns. In chalender d'occurrenza ed infurmaziuns davart uniuns duain er mussar la part activa.
Digital ed independent dal lieu
Cun la plattafurma vul la regenza er accumplir in dals puncts principals dal program da regenza actual. Ella è vegnida realisada en collavuraziun cun differentas organisaziuns chantunalas e regiunalas.
Link a la plattafurma
Ozendi saja numnadamain impurtant da pudair metter a disposiziun infurmaziuns culturalas a moda digitala, uschia la directura da l'Uffizi chantunal da cultura en ina communicaziun. Uschia duaja mintgin – da persunas indigenas sur turists fin tar persunas ord economia, furmaziun e scienza – avair access immediat a quai ch'interessescha. Plinavant è la plattafurma en tschintg linguas, quai ch'augmentia il circul d'utilisaders.
Identitad ed integraziun
Dad ina vart rinforzia la plattafurma l'identitad chantunala, uschia il cusseglier guvernativ responsabel Jon Domenic Parolini.
Che la cultura dal Grischun è pli visibla e pli accessibla, [...] stgaffescha da l'autra vart las meglras premissas per ina vasta integraziun e participaziun a la vita sociala e culturala.
Per render pli enconuschenta la plattafurma duai la fin dal mais vegnir lantschada ina campagna da reclama online. Plinavant duai tar las occurrenzas davart «500 onns Stadi liber da las Trais Lias» vegnir fatg attent a la purschida.
