Siglir tar il cuntegn

Header

in mustgin-tigher
Legenda: Quest mustgin-tigher sa transmetter fevras privlusas. Keystone.
cuntegn

Insects malvesids La populaziun dals mustgins da l'Asia crescha

Il mustgin-tigher asiatic ed il mustgin da chaglia sa sentan adina pli fitg da chasa en il Grischun. Quai mussan ils resultads da l’uffizi chantunal per la natira ed ambient. Dapi 2016 fan els in monitoring da quels mustgins ed il dumber da mustgins che van en la trapla s’augmenta.

Il mustgin-tigher asiatic ed il mustgin da chaglia giapunais derivan da l’Asia. Pli e pli vegnan els dentant era registrads en il Grischun. Quai che differenziescha els dals mustgins indigens è ch’els pon dar vinavant malsognas ch’èn privlusas per il carstgaun. Tranter auter la fevra da «Dengue» u la fevra da «Chikungunya». Tenor Marco Lanfranchi, il responsabel per il monitoring en il Grischun, sajan mintg’onn dapli mustgins vegnids registrads.

dus muschins dal'Asia.
Legenda: Il mustgin da chaglia giapunais (sanester) ed il mustgin-tigher asiatic (dretg) sumeglian fitg. I dat dentant pitschnas differenzas. Las chommas davos dal mustgin-tigher fineschan cun ina sdrima alva. Las chommas dal mustgin da chaglia giapunais chalan si stgir. MAD.

Il privel po s’augmentar vinavant

Tenor la prognosa da Marco Lanfranchi èsi bain pussaivel che cunzunt il dumber dal mustgin da chaglia giapunais po sa sviluppar vinavant cunquai che quella spezia è gia etablida en pliras parts dal Grischun dal Sid. Dentant era en il nord saja quel gia vegnì registrà. I dependa dentant era da la situaziun climatica. Per ch’il mustgin possia sa reproducir, dovria be in paltaun ni ina fulla d’aua per deponer ils ovs. Suenter circa 1 – 2 emnas èn els creschids ora e valan sco nova generaziun.

Il mustgin-tigher percunter n’è betg anc etablì cumplettamain en il Grischun. Uschia dependa sia populaziun dal import or d’autras regiuns cun temperaturas miaivlas sco per exempel il Tessin ni l’Italia. Perquai chattan ins el en las regiuns cunfinarias dal Grischun sco per exempel en la Mesolcina u en la Bregaglia. Il transport dal mustgin en il Grischun po capitar sco passagier clandestin en in auto. Perquai chattan ins quella spezia savens era enturn pausadis d’autostrada.

RTR actualitad 12:00

Artitgels legids il pli savens

Scrollar a sanestra Scrollar a dretga