Ina gronda part dals uffants na va betg a l'instrucziun da religiun. Uschia va quest rom pli e pli a perder en las scolas popularas, sco quai che Curdin Marc, il president da la baselgia refurmada, manegia. Per far frunt a quest svilup ha la baselgia refurmada da Cuira sviluppà novas medias che duain far gust als giuvenils da sa fatschentar pli fitg cun la religiun. Curdin Mark è da l'avis, ch'ins duess agir ad uras e betg spetgar memia ditg cun las mesiras.
Per quest motiv avain nus sviluppà ussa differentas medias, dal podcast sur in cudesch da malegiar fin al comic.
Il Refurmatur Johannes Comander (*1484)
Entaifer las novas medias gioga la biografia dal refurmatur Johannes Comander, ch'ha vivì durant il 16avel tschientaner, ina rolla impurtanta. Comander ha inizià avant 500 onns la refurmaziun a Cuira. Quai ha er gì ina gronda influenza sin l'istorgia dal Grischun. Il plevon è s'engaschà da lezzas uras per la libertad da cretta ed ha procurà per ina nova orientaziun da la baselgia. Ils cuntegns da las novas medias sa refereschan medemamain sin la refurmaziun a Cuira. Uschia duain ils giuvenils vegnir sensibilisads per ils eveniments dal passà, sco quai che Curdin Mark, president da la baselgia refurmada da Cuira, declera.
Ultra da la vita da Comander vegnan tematisads sco aspects etics er temas sco perdun u amicizia. Las novas medias sa cumponan d'in cudesch per uffants, d'in comic per giuvenils e d'in podcast per creschids ch'è d'udir sin Spotify.
En emprima lingia sa tracti da material per la scola, ma ils cudeschs pon er vegnir cumprads en il commerzi da cudeschs. Ultra da quai accentuescha Curdin Mark, ch'ils cuntegns na sa drizzan betg mo a persunas refurmadas, mabain er a catolicas.
La giuventetgna d'ina vart e la religiun da l'autra vart – tras las novas medias duain questas duas varts puspè vegnir reunidas pli fitg. Tenor Curdin Mark ha quella finamira in bun motiv:
Be pli la mesadad dals uffants sa participescha a l’instrucziun da religiun.
Per quest motiv vul la baselgia refurmada da Cuira intermediar a la societad da betg prender lur uffants or da l’instrucziun da religiun.
