Glindesdi avantmezdi en la stanza da zambregiar da la scola superiura a Malans: Tschintg scolars da la segunda superiura èn sa rimnads cun la scrinaria Fiona Schärer enturn ina maisa. La giuvna reparta fegls da teoria e repeta ils nums dals guaffens cun ils giuvenils.
La Bernaisa surprenda quest onn quatter lecziuns da zambregiar a Malans. Per ella è quest onn da scola ina sort experiment, per chattar ora sche la lavur sco scolasta la plaschess.
Jau hai gia adina vulì cumbinar mes mastergn cun la pedagogia.
Suenter l'emprendissadi e la maturitad professiunala ha ella vulì lavurar sco assistenza da classa. En il Grischun na sajan assistenzas da classa però betg uschè tschertgadas sco a Berna. Cunquai ch'ella è scrinaria è ella lura vegnida dumandada d'instruir zambregiar a Malans.
Experientschas persunalas sco buna preparaziun
Fiona Schärer raquinta ch'ella haja pervia da sia legastenia gì da cumbatter durant sia carriera da scola. Ella è sa dumandada sch'ella possia instruir, ma crai che la legastenia è era in avantatg, perquai ch'ella ha uschia dapli chapientscha per scolars e scolaras pertutgadas. Sias cumpetenzas socialas sajan adina vegnidas ludadas fitg.
Jau hai vulì nizzegiar mias fermezzas.
Planisar e preparar possia ella era bain – quai che tutga gea era tar la lavur d'ina scolasta. Sias experientschas sco manadra da trenaments da navigar a vela per giuvenils ed uffants ed in curt curs d'assistenza da scola sajan stadas ina buna preparaziun.
Sco emprim project ha la scolasta planisà ina pitschna platta per metter sut in magiel. Ils scolars taglian ora rudels da lain ed als decoreschan cun tecnica da servietta – quai che serva lura sco platta. Enturn ina buttiglia da gervosa lian els ina corda e brischan la part sura, per ch'i dettia in magiel da baiver. Fiona Schärer parta en las gruppas, passa tras la stanza e dat dapertut tips.
Reacziuns positivas
Fin uss na bada la scrinaria nagin dischavantatg, perquai ch'ella n'ha nagin diplom. Anzi, i saja in grond avantatg ch'ella po profitar da sia savida dal fatg. Ses conturn famigliar ed ils collavuraturs e las collavuraturas en la scrinaria hajan reagì positivamain. Tar ils scolars e las scolaras saja quai medemamain il cas.
Era il facit da la scrinaria sezza è positiv: Ses emprim di è Fiona Schärer stada in zic gnervusa – ella di però ch'ella na savess betg stuì far quitads, i haja funcziuna bain.
Plans per l'avegnir
Actualmain lavura Fiona Schärer anc trais dis en la scrinaria, nua ch'ella po savens era far diever da restanzas da lain per la scola. Suenter las vacanzas d'atun vegn ella supplementarmain a surprender ina substituziun sco scolasta da sport. Fiona Schärer n'è anc betg sa decidida definitivamain co ch'i va vinavant en il futur, ma ella ha planisà da frequentar la scola auta pedagogica, per lura era pudair instruir auters roms.
Per oz hai però mo pli num: Far urden e dir adia.
