Adora Fischer, ch'è sezza arrivada la fin dals onns 1980 en Svizra ha mess a sasezza la finamira da sustegnair ed accumpagnar immigrantas ed immigrants filippins a Cuira ed en il Grischun en lur mintgadi e da promover in barat cultural. Curt suenter sia arrivada en Svizra ha ella fundà l'uniun «Balikatan». Il pled deriva da la lingua filippina tagalog ed Adora Fischer declera el uschia: «Porscher a l'auter sia spatla per parter la chargia».
Porscher agid a dunnas estras sin via privata è fich grev. Perquai èsi impurtant dad instituziunalisar quel.
1993 prenda l'uniun a fit lur emprimas localitads per porscher in center d'inscunter. Da quest temp purschevan els er anc in alloschi d'urgenza per dunnas filippinas pertutgadas da violenza a chasa. Durant ils proxims 30 onns è lur purschida lura sa sviluppada vinavant. Il Balikatan beneventa e sustegna entant er immigrants ed immigrantas dad auters pajais e culturas er sche lur purschida vegn cunzunt nizzegiada da glieud filippina.
Oz porscha l'uniun curs da tudestg, sustegna tar sfidas birocraticas ed ha ina gruppa da gieus. L'intent principal è da sensibilisar glieud filippina per la cultura svizra e grischuna, ma er da mantegnair lur atgnas ragischs. Da l'autra vart vulan ellas era dar d'encleger meglier lur identità culturala a lur partenaris u uffants ch'én naschids en Svizra.
Finanzià vegn il Balikatan dal chantun e da donaziuns, ma era da lavur voluntaria da l'uniun u in stan da vendita a la festa da citad a Cuira.
Suenter 30 onns è l'uniun per Adora Fischer, ch'ha 68 onns, anc adina ina chaussa dal cor. Gugent dess ella però il project en mauns pli giuvens. E sch'i dess dapli sustegn finanzial fissi era pussibel da remunerar la lavur prestada.
Or da l'archiv