Siglir tar il cuntegn

Header

audio
Program d'integraziun en il Grischun: Bilantscha dal project
Or da Actualitad dals 03.05.2023. Maletg: Keystone
laschar ir. Durada: 4 minutas 10 Secundas.
cuntegn

Integraziun In experiment cun success

Ils responsabels dal post d'integraziun èn cuntents cun il nov program d'integraziun chantunal. Radund 50 mesiras èn vegnidas formuladas en in process participativ.

L’interess è sta grond cura ch’il post d’integraziun chantunal aveva envidà la populaziun d’inoltrar ideas co integrar ad estras e fugitivs. Radund 40 propostas èn vegnidas inoltradas en scrit e bunamain 100 persunas han participà a lavuratoris per elavurar pretaisas concretas. Persunas da tuttas naziunalitads, indigenas sco era fugitivs ed organisaziuns socialas èn sa participadas per sviluppar il nov program d’integraziun chantunal, curt 'KIP3'. Sin basa da las propostas ha il post d’integraziun formulà il nov program che duai metter la basa per la lavur d’integraziun dals onns 2024-2027.

Il resultat [dal process participativ] è ina fitg buna basa per ils proxims quatter onns.
Autur: Felix Birchler manader dal post d’integraziun chantunal

Naginas surpraisas dentant soluziuns concretas

Da principi enconuscha il post d’integraziun ils basegns d’estras, requirents d'asil e da la populaziun. Surpraisas n’hai pervia da quai betg dà tar las propostas formuladas. Igl ha dentant dà soluziuns concretas. Ina proposta è stada l’idea d’in bus d’integraziun. Quel duai pudair consultar clientas, pia persunas estras u fugitivs, era en las regiuns perifericas. Quai cun agid da persunal dal post d’integraziun e cun persunas indigenas. In’autra idea propona curs da lingua gia durant la procedura d’asil. Persunas cun grondas schanzas d’asil duain uschè pudair nizzegiar il temp da spetga.

Las radund 50 mesiras formuladas èn tuttas resultadas or dal process participativ.
Autur: Felix Birchler manader dal post d’integraziun chantunal

Il process participativ è tenor Felix Birchler stà in grond success e duai era en futur vegnir applitgà. Il KIP 3 è vegnì inoltrà la fin d’avrigl tar la confederaziun. Quella ha uss temp per far remartgas. En futur duai il program servir sco controlla per analisar tge mesiras ch’èn vegnidas cuntanschidas.

Tge è il KIP3?

Avrir la box Serrar la box

Dal 2010 èn la Confederaziun ed ils chantuns sa cunvegnids da sviluppar l’integraziun d’estras ed esters en la Svizra e da formular ina strategia communabla. Sin basa da quella finanziescha la Confederaziun la promoziun d’integraziun en ils chantuns. L’emprim program d’integraziun chantunal (KIP1) ha durà dal 2014-2017. In segund program (KIP2) è suandà dal 2018-2021. Per ils onns 2021 e 2022 hai da excepziunalmain ina fasa da dus onns, e per il 2024 (KIP3) segua puspè ina program da quatter onns.

RTR actualitad 07:00

Artitgels legids il pli savens