Siglir tar il cuntegn

Header

audio
Idea e finamiras dal process participativ
Or da Actualitad dals 17.01.2023. Maletg: RTR
laschar ir. Durada: 3 minutas 41 Secundas.
cuntegn

Integraziun Ramassar ideas e giavischs or da la populaziun

En in process participativ vul il chantun sviluppar il proxim program d'integraziun chantunal. Cun lavuratoris a Cuira duain vegnir formulà basegns concrets dal pievel.

Sviluppar l'integraziun chantunala cun agid da la populaziun. Quai è stà l'idea dad in lavuratori a Cuira, avert per tuttas persunas or da la populaziun che s'interesseschan.

L’atun ha la regenza deliberà in credit d’obligaziun ed ussa han ils chantuns temp enfin ils 30 d’avrigl d’elavurar il KIP3, in program d’integraziun chantunal che vala dal 2024-27.

Tge è il KIP3?

Avrir la box Serrar la box

Dal 2010 èn la Confederaziun ed ils chantuns sa cunvegnids da sviluppar l’integraziun d’estras ed esters en la Svizra e da formular ina strategia communabla. Sin basa da quella finanziescha la Confederaziun la promoziun d’integraziun en ils chantuns. L’emprim program d’integraziun chantunal (KIP1) ha durà dal 2014-2017. In segund program (KIP2) ha suandà dal 2018-2021. Per ils onns 2021 e 2022 hai da excepziunalmain ina fasa da dus onns, e per il 2024 (KIP3) segua puspè ina program da quatter onns.

Per l’emprima giada vegn il program definì cun agid da la populaziun, che ha gì la pussaivladad d’inoltrar ideas concretas ed annunzias enfin ils 15 da december.

L’integraziun capita en il mintgadi, igl è evident da definir nossas directivas sco chantun ensemen cun la populaziun.
Autur: Felix Birchler manader dal post d’integraziun chantunal

Il process participativ saja in experiment, pervia da quai n’haja ins betg gì aspectativas concretas. Tant pli surprais èn las organisaturas ed ils organisaturs stads da las passa 100 annunzias.

L’experta maina urden en il lavuratori

Cun agid dad Anja Wyden Guelpa han ins pudì structurar il lavuratori a Cuira, che ha tar l’emprima giada gia gì radund 50 participantas. La docenta dad innovaziun e da pensar ha manà l’emprim lavuratori ed ha implementà in sistem da post-its, flip charts e notizias ch'ha gidà als participants da formular, discutar e cristallisar ils basegns en connex cun l’integraziun.

Igl è impurtant da ramassar ideas a moda vasta e collaborativa empè d’ina concurrenza d’ideas.
Autur: Anja Wyden Guelpa Cussegliadra d’innovaziun e d’affars

Impiegadas d’organisaziuns d’affar, interessads sco era persunas pertutgadas èn arrivadas ed han durant in lavurdi elavurà en gruppas da 6-7 persunas differents giavischs concrets. Giavischs sco l’integraziun cumplaina, individuala ed effizienta, l’optimisaziun dal diever da finanzas e da l’integraziun en la lavur sco era infurmaziuns pli concretas en connex cun furmaziun e la renconuschientscha da quella èn vegnids formulads.

audio
Participantas e participants dal lavuratori
ord Actualitad dals 17.01.2023. Maletg: RTR
laschar ir. Durada: 3 minutas 51 Secundas.

Suenter trais lavuratoris van las ideas en consultaziun e vegnan lura finalisadas da las participantas e dals participants. Il post d’integraziun chantunal decida tgenins che arrivan en il program definitiv. Quel va tar la cumissiun chantunala d’integraziun e sto lura vegnir approvà da la regenza avant ch’el vegn inoltrà tar la Confederaziun.

RTR actualitad 07:00

Artitgels legids il pli savens