Interpresas da construziun grischunas èn anc adina sut la marella

La Cumissiun da concurrenza da la Confederaziun guarda enavos sin in bun onn. Decisiuns impurtantas haja dà en il sectur dal commerzi online sco era tar las taxas da las cartas da credit. Uschia la CUMCO a chaschun da la conferenza da medias annuala a Berna.

Rafael Corazza, il directur dal secretariat CUMCO dat pled e fatg avant las medias. Bild in Lightbox öffnen.

Legenda da maletgs: Rafael Corazza, il directur dal secretariat CUMCO dat pled e fatg avant las medias. Keystone

Anc betg terminada è l'inquisiziun cunter numerusas interpresas da construcziun grischunas.Dapi la fin d'october 2012 regia malruaus tar ils impressaris grischuns. Dapi lura intercurescha la Cumissiun da concurrenza il far e demanar da 17 interpresas da construcziun en l’Engiadina Bassa. In mez onn pli tard ha ella extendì l'inquisiziun sin 25 interpresas da l’entir Grischun.

CUMCO ha indizis concrets

Els hajan indizis concrets ch’i haja dà consultaziuns e cunvegnas tranter quellas, hai gì num da vart da la CUMCO. Concret saja vegnì decis tgi che duaja s'annunziar sin concurrenzas e co che projects da construcziun e clients vegnan repartids tranter las interpresas.

Dus onns e mez suenter l'entschatta da l’iinquisiziun sajan els anc adina entamez las lavurs, conferma Rafael Corazza, il directur da la CUMCO. Dapli detagls dastgi el però betg tradir.

Cas duai esser terminà il 2016

Tuttina dettia quai indizis ch'il cas en il Grischun saja dapli ch'ina piculezza. La dretgira administrativa federala ha per exempel decis che la CUMCO dastga duvrar ils documents confiscads a chaschun da las razzias els biros da las interpresas. Quellas eran sa dustadas cunter quest pass. Era la dretgira federala para pia d'esser da l’avis ch’i valia la paina d’intercurir da rudent il cas.

In'infurmaziun ha Rafael Corazza lura tuttina anc pudì dar. Els spetgian da pudair terminar il cas en il decurs da l'auter onn.

RR novitads 12:00