Siglir tar il cuntegn

Header

video
San Bernardino duai daventar proxim «Andermatt»
Or da Telesguard dals 04.01.2023.
laschar ir. Durada: 4 minutas 4 Secundas.
cuntegn

Investur tessinais Nova speranza per San Bernardino

In nov project cumplessiv duai purtar nov schlantsch a San Bernardino. In investur dal Tessin planisescha da dar nova vita turistica. Hotels, abitaziuns administradas ed ils implants da skis duajan vegnir modernisadas cun il project San Bernardino Swiss Alps.

La speranza en vischnanca è gronda. Il temp dad aur dals onns 70 ed 80 è daditg temp passà. Cun il project San Bernardino Swiss Alps vuless l'investur tessinais Stefano Artioli purtar nova vita en la vischnanca, rapporta RSI. Il plan cumplessiv vuless in nov center da vischnanca, hotels da luxus e renovar ils implants da sport. En quels plans è er previs da surpigliar da la famiglia Ghezzi ils implants ed il territori da skis ch'è ils ultims 10 onns stà serrà la gronda part dal temp.

audio
Ils plans da San Bernardino Swiss Alps
ord RTR Audio dals 05.01.2023.
laschar ir. Durada: 3 minutas 29 Secundas.
Pendiculara sur San Bernardino.
Legenda: Las pendicularas San Bernardino Impianti Turistici han ils onns 2016-2017 gì ina curta reavertura. Keystone

Populaziun è infurmada

Las davosas emnas ha Stefano Artioli che maina ina firma d'immobiglias internaziunala, infurmà ils represchentants da la vischnanca politica e burgaisa ed avant curt er ils abitants e las abitantas. Circa 300 persunas sajan stadas a l'infurmaziun publica, ha ditg il president communal Christian de Tann sin dumonda dal schurnal regiunal Grischun da SRF.

Discurrì vegn dad investiziuns da 300 milliuns francs, confermada n'è quella summa dentant betg. Las emprimas cumpras d'hotels e stabiliments vids èn fatgas. Planisà è dad esser pront cun las emprimas unitads da dar a fit l'enviern 2024/25. Ils implants da skis duajan esser pronts in onn pli tard. Enfin che tut è pront datti anc diversas votaziuns communalas per midadas da zonas, da concessiuns ed igl è da spetgar sin lubientschas.

RTR actualitad 12:00

Artitgels legids il pli savens