«Jau fatsch quitads per dretgs democratics en il Grischun»

Gia duas giadas quest onn ha il Tribunal federal a Losanna gì da decider davart iniziativas che regenza e parlament dal Grischun han declerà sco nunvalaivlas. Per l'expert per democrazia Andreas Glaser èsi cler: La politica sto midar sia pratica e laschar votar il suveran da talas iniziativas.

L'expert per democrazia Andreas Glaser. Bild in Lightbox öffnen.

Legenda da maletgs: L'expert per democrazia Andreas Glaser. RTR, Gion Gieri Flepp

Il matg 2017 ha il Tribunal federal gì da decider davart l'iniziativa da linguas estras ed ussa davart l'iniziativa per abolir la chatscha speziala. Omaduas iniziativas avevan la regenza ed il Cussegl grond declerà ordavant sco nunvalaivlas.

Arguments flaivels per declerar nunvalaivel

Andreas Glaser n'è betg surstà da la decisiun dal Tribunal federal. Regenza e parlament grischun hajan gì arguments fitg flaivels per declerar nunvalaivla l'iniziativa per abolir la chatscha supplementara, ha ditg l'expert per democrazia e docent a l'universitad da Turitg, Andreas Glaser ad RTR.

«  La democrazia en il Grischun è en in modus da crisa. »

Andreas Glaser
expert per democrazia e docent da dretg public

En nagin auter chantun da la Svizra dettia la pratica da declerar nunvalaivlas tantas iniziativas. Ed Andreas Glaser accentuescha ch'i sa tractia d'iniziativas cun temas populars sco la lingua da scola u la chatscha – temas che fatschentian era en auters chantuns.

Motivs daco che la regenza ed il Cussegl grond dal Grischun han valità gist duas iniziativas sco nunvalaivlas vesa Andreas Glaser tranter auter en il sistem electoral, pia ch'il Cussegl grond vegn elegì tenor il sistem da maiorz. Uschia na saja il parlament betg uschè represchentativ sco en auters chantuns.

Plinavant sa tractia tar ils iniziants da persunas privatas che n'hajan betg uschè ina ferma vuschs sco p.ex. partidas politicas.

«  La politica grischuna duai laschar decider il pievel. »

Andreas Glaser
expert da democrazia e docent da dretg public

Per l'avegnir spera Andreas Glaser che la politica grischuna midia sia pratica e chalia da declerar nunvalaivel talas iniziativas. L'iniziativa saja numnadamain in instrument impurtant da la democrazia – l'instrument dal pievel per exprimer giavischs e da pudair laschar votar il suveran.

RR actualitad 07.00