Mazina von Planta-Orlik è stada ina da duas persunas, ch'eran anc en suprastanza avant la sesida averta. Igl è stà fitg impurtant per ella, ch'i dettia er l'onn proxim ina Pride, di ella. Dapi in onn è la dunna da 35 onns en la suprastanza da la «Khur Pride». Sco ultima speranza ha la suprastanza restanta organisà ina sesida averta il november – e quai cun success.
Mazina von Planta-Orlik raquinta: «Nus essan stads fitg surprais quantas persunas ch'èn vegnidas a questa sesida averta.» Spetgà avevan els trais, quatter persunas – la fin finala eran quai var 15.
Suenter quella sesida cun discussiuns e retrospectivas devi tuttenina puspè ina suprastanza da la Khur Pride. Dad ina vart saja ella fitg engraziaivla per il grond sustegn, di Mazina von Planta-Orlik. Da l'autra vart dettia quai dentant bler d'organisar en il futur, perquai che la gronda part da la suprastanza na sajan betg dal Grischun.
Nus essan stads fitg surprais, quantas persunas ch'èn vegnidas a questa sesida averta – nus eran enturn 15 persunas.
I saja grev da chattar Grischunas e Grischuns, raquinta ella. Bleras Grischunas queeras sajan idas en la bassa, ed i dettia en general bler pli paucas persunas en il Grischun che per exempel a Turitg. Qua pon ins sa dumandar: Pertge dovri ina «Pride» en il Grischun? Vala quai la paina?
Gist lura rendia il pli fitg, di Mazina von Planta-Orlik. «Igl è precis quai - en il Grischun hai pauca glieud ed er blers giuvens, che na pon betg ir a Turitg u Berna ad ina «Pride», e per tut questa glieud dovri ina «Pride» tar nus en il chantun», di ella vinavant.
La «Pride» saja in eveniment impurtant per persunas queeras, di Mazina von Planta-Orlik. Quai èn tut quellas persunas, ch'han in'autra sexualitad u in'autra schlattaina che eterosexuala u cisgender. Per exempel dunnas lesbicas, umens omosexuals, persunas bisexualas u umans transgenders.
Uss èsi da planisar!
La finamira fiss stada da far la demonstraziun il zercladur, durant il mais da «Pride», ma sco i vesa ora vegn ad avair lieu la proxim'occurrenza il settember a Cuira. Ma quai saja tuttina, di Mazina von Planta-Orlik. Ella saja simplamain cuntenta, che quai funcziuna ussa tuttina.