Per il kino Apollo a Cuira è vegnida inoltrada ina dumonda da spazzar. Sin quai hai er dà critica: Or da vista urbanistica e culturala saja quai donn, ins prendia al quartier identitad ed istorgia, di Ludmilla Seifert da l'organisaziun Protecziun da la patria dal Grischun. La Kino Chur SA ha declerà ses motivs en ina communicaziun da medias.
Dispitaivel sch'igl è da proteger l'edifizi
La citad da Curia ed in gremi d'expertas n'èn betg perina, sch'igl è da proteger l'edifizi. Il gremi ha mess el sin ina glista d'edifizis degns da vegnir protegids, la citad Cuira ha dentant puspè stritgà il bajetg da questa glista.
La manadra da la Protecziun da la patria Ludmilla Seifert crititgescha era la tenuta da stgarpar giu edifizis en general. Quella ravgia da stgarpar giu saja dispitaivla en connex cun la stgaudada dal clima. Per bajegiar a moda persistenta saja da bajegiar cun las chaussas ch'èn gia avant maun.
Anc betg segir sch'i vegn stgarpà gì vairamain
Sch'il bajetg vegn propi spazzà n'è anc betg decidì. Fin mez matg pon ins far recurs cunter la dumonda da spazzar l'edifizi, scriva la Kino Chur SA en ina communicaziun. Ins saja en discurs cun plirs partenaris. Ina varianta saja er ina midada d'utilisaziun da l'areal. Ina schliaziun dovria dentant bainprest, damai che lavurs da sanaziun vi dal bajetg sajan necessarias. Il kino na survegnia betg daners publics e la clientella restia a chasa anc pli savens dapi la pandemia, e na vegnia betg pli en il kino.
Il kino Apollo è vegnì avert l'onn 1956. Sper il kinocenter dasper l'edifizi dal Cussegl grond, è l'Apollo il segund kino a Cuira che vegn manà da la societad Kino Chur SA.
