Siglir tar il cuntegn

Grischun Kino cunter lungurella: 2 films novs ed 1 nov classicher

Pil mument n'èn betg da vesair en il kino be dus novs films dals reschissurs renumads Steven Spielberg e Roland Emmerich, mabain er il terz toc da Star Trek - la nova versiun dal classicher. Quai empermetta action.

Legenda: Tadlar il audio «Independence Day 2: l'apocalypsa vegn puspè - bunamain.». Durada 4:28 minutas.
4:28 min, Actualitad dals 22.07.2016.

Puspè pon ins guardar, quant bumbastic ch'il mund na va betg sutsur. Er en il nov film da Roland Emmerich è l'apocalipsa datiers; quai en il segund toc da «Independence day», cumparì 20 onns suenter l'emprima part. E puspè èn ils aliens quels che vulan destruir la carstgaunadad. Natiralmain pli blers, pli gronds ed er pli ferms. E natiralmain dat quai in happy end sco el po vegnir be da Hollywood.

Insumma: I na dat betg bleras surpraisas. Bleras giadas san ins gia ordavant, tgi che è quel che sgola il pli agil tras las attatgas dad aliens, tgi che s'unfrescha per la humanitad e tgi che ha la gloriusa idea che spindra la fin finala tuts. Ed er sch'ils acturs - per part anc quels da l'emprim film sco il superperdert David Levinson (giugà da Jeff Goldblum), ses bab, il president, ubain il professer trubistgà - bittan trasora cun plattitudas. Ma lungurus na vegn quai betg.

BFG - fitg bel, e quai èsi

In auter starreschissur ch'è pil mument da vesair sin la taila gronda è Steven Spielberg cun ses film da fantasia «Big friendly giant» - ubain curt: BFG.

Il gigant daventa l'ami dad ina buoba orfna da 10 onns ed ensemen cumbattan els ils gigants nauschs. Il film sa basa sin ina istorgia da Roald Dahl da l'onn 1982 ed è ina coproducziun da Spielberg, Dreamworks e Disney. Igl è l'emprima giada che Spielberg surpren la reschia tar in film da Disney. Quai film sto pia bunamain esser bun.

Dentant èn las spetgas forsa in zic grandas. Il film n'è ni quai ch'ins è disà da Disney (per exempel muments da larmas sco cura che Mufasa sto murir) ni la tensiun ch'ins è disà da Steven Spielberg (cura ch'il T-Rex è davos l'auto). Il plus dal film è dentant la super animaziun, cunzunt da la fatscha e mimica dal gigant. Er sche l'istorgia n'è pia betg tant excitanta, cura ch'il gigant ri uschè charin, èn ins tuttina led dad avair guardà il film.

Captain Kirk en la crisa

Ed il terz film che procura per il mument per tensiun en ils kinos è il nov Star Trek. Quella giada betg dal reschissur renumà J. J. Abrams, mabain da Justin Lin che ha tranter auter fatg «Fast and furious». La fermezza dal film èn las scenas da cumbat che persvadan: La Enterprise vegn rapinada, cupitga dal tuttafatg, n'ha nagina schanza cunter ils aliens che sgolan en formaziun da schauma.

Ils puncts negativs: Captain Kirk ha l'entschatta dal film in zic ina crisa da lavurar. Dentant quai n'è betg propi impurtant per la istorgia e fa lura era in zic lungurusa l'emprima part dal film. In auter punct negativ è che Scotty, ch'entaupa la nova heroxa Jaylah, di adina a quella «Schätzchen». Quai è pegiurativ e va cun il temp in zic sin la gnerva.

RR actualitad 11:00