L'uniun «Kulturraumnetzwerk» a Cuira ha ina nova manadra da fatschenta, sco las gasettas da Somedia rapportan. Andrina Casutt da Falera surpiglia il timun. Ella è architecta d'interiurs, szenografa ed artista.
Avant in onn ha ella preschenta ses project final da studi «Casa Sil Punct» a Falera.
L'uniun «Kulturraumnetzwerk» è il resultat d'ina votaziun d'avant in onn. La populaziun da Cuira ha decis d'investir mintg'onn radund in mez milliun francs per schlargiar la purschida da cultura.
Dapli spazi per art e cultura
Cun l’uniun «Kulturaumnetzwerk» vul Cuira far ina fin a la mancanza da locals d'emprova e producziun per la cultura. Suenter il Gea dal pievel a la nova strategia da cultura è vegnì suttascritta ina cunvegna da prestaziun cun l'uniun tetgala «Kulturaumnetzwerk», communitgescha la citad.
Quella prevesa tranter auter ina contribuziun annuala maximala da 521'000 francs l'onn. Cun quests daners pon vegnir intermediads ed affittads locals supplementars per uniuns da cultura e per artistas ed artists. En il center stat er il patratg che las localitads vegnan duvradas da pliras partidas. Las emprimas contribuziuns han gia pudì vegnir retratgas il fanadur.
