Pleds sco «Benchmark», «Crossboarder» ubain er «Tschains passiv» tutgan tar il vocabular da preschentar l'onn da gestiun da la banca. Dentant quant fit èn ils participants cun l'inagiain dal linguatg da bancas? Nus avain dumandà - e gist er laschà declerar il profi, il CEO da la banca Alois Vinzens tge che las expressiuns tecnicas da la banca muntan.
Intgins terms tecnics
Sco emprim il «scrit da participaziun», il motiv pertge che tuts èn insumma sa rimnads a Cuira. «In scrit da participaziun è en sasez sco ina aczia be cun la differenza, ch'ils participants na dastgan betg votar e prender part da las decisiuns», declera il schef da la banca. La radunanza da participaders è pia, ditg simpel, ina rimnada da glieud che ha investì en la banca per guardar, tge che la banca ha fatg l'onn passà cun lur daners.
Ed er cun auters terms tecnics fa Alois Vinzens in zichel urden. «Benchmark» per exempel è «ina cumparaziun, ch'ins mira lura, nua stat la banca en cumparaziun cun autras industrias.» E la «Payout Ratio» è atgnamain insatge gnanc uschè cumplicà. Payout Ratio è la part dal gudogn che vegn pajà or als investurs, pia la distribuziun da dividendas ubain per tudestg anc pli simpel, la «Ausschüttung».
E nus avain er anc dumandà suenter auters pleds - il quietant: I va in zic cun tuts tuttina, il linguatg da banca è per blers plitost in ester.
Onn da fatschenta 2015
Il CEO Alois Vinzens saja cuntent cun il gudogn dal concern da 168, 2 milliuns francs, quai che munta ad in augment da 4,4 pertschient.
Cun ina creschientscha netta da 2,9 pertschient areguard il volumen da fatschenta haja la BCG pudì defender uschia sia ferma posiziun en il Grischun, scriva la banca.
Il bun resultat dal 2015 mussa la gronda prestaziun da nossas collavuraturas e da noss collavuraturs sco era nossa ferma attaschadadad cun il Grischun.
Che quella attaschadadad na s'exprimia dentant betg mo en il mintgadi da fatschenta, mabain er en lur engaschi per l'ambient e la societad, sa lascha citar il CEO.
La Banca Chantunala ha pudì repartir quest onn 95 milliuns francs. Quai signifitga ch’i dat ina dividenda da 38 francs per certificat.
RR novitads 18:00