Discutai er Vus en «La Fitterlada» dal Radio Rumantsch! L'ultima chaschun da sa participar è questa mesemna, ils 13 da favrer tranter las 10 e las 11 uras.
Part 3: Mes pass (13 da favrer)
Tar la terza ediziun da la «Fitterlada» ha la trenadra persunala Ornella Poltera dà tips live en il studio dal Radio Rumantsch. Per restar fit sur tut l'onn cusseglia Ornella Poltera da nudar fix en l'agenda las uras per far sport. Plinavant saja prudent da bajegiar si successiv la cundiziun per evitar frust. Moviment e nutriment giajan ensemen per cuntanscher finamiras individualas.
Part 2: Mes pes (30 da schaner)
«Ina crema dals pes pon ins er duvrar per la fatscha – cuntrari na va quai però betg», di Marlis Oertli-Levy, podologa medicinala a Sagogn. La podologa declera en «La Fitterlada» quant fina che la pel dals pes è e tge tgira che la pel dovra cunzunt l'enviern. Bogns curts cun aua fraida e far bogn en aschieu saja ina buna profilaxa cunter pel dira, cunter bulieu e cunter nausch fried dals pes. Tar egls-giazla na duajan ins betg tagliar enturn sez, mabain adina ir tar la podologa. Quels ed auters cussegls dat Marlis Oertli-Levy en «La Fitterlada».
Part 1: Mes pais (16 da schaner)
«Patir fom n'è betg necessari per perder pais», di Angela Castelberg, cussegliadra da nutriment en l'Ospital chantunal a Cuira. Sche Vus tutgais tar las persunas che na van betg regularmain en il studio da fitness, lura chaschuna il pass sin la stadaira magari in tschert frust l'entschatta da l'onn. Tge pudain nus far per restar en furma? En «La Fitterlada» dals 16 da schaner ha Angela Castelberg dà tips davart in nutriment equilibrà e co ch'ins po perder pais senza patir fom.
RR La Fitterlada 10:00