Da glina plaina na datti betg dapli pazients e pazientas che entran ina clinica psichiatrica. Era betg da glina nova. La glina n’ha nagina influenza. Per vegnir tar questa conclusiun èn datas da 18’000 pazients e pazientas da las clinicas da Beverin a Cazas e dal Waldhaus a Cuira vegnidas examinadas.
Mitus influenzà da la glina
Betg mo la gronda part da la populaziun è persvadida ch’i dettia in connex cun la glina e la psica, era tar ils medis chattan ins quellas ideas. Uschia hajan els vulì far quest studi, ha Andres Schneeberger, il manader dal studi e schefmedi dals servetschs psichiatrics dal Grischun, declerà envers il schurnal regiunal da radio SRF.
Resultat impurtant
Uss èsi cler – il mitus na constat betg. Quai saja impurtant per ch’ils medis na crajan betg vi da cardientschas blauas, ch’els lavurian cun datas scientificas ed emprovian da gidar ils carstgauns cun las enconuschientschas las pli modernas da la scienzià, di Schneeberger.
Fervent giavisch da crair vid pussanzas estras
Per ils medis èsi uss cler, la glina n’ha nagina influenza. La populaziun pudess dentant vinavant sa declerar tscherts fatgs cun la glina. Il giavisch è grond ch’i dettia anc autras forzas che influenzeschan l’agen agir ed ils agens sentiments.
Il studi grischun è schizunt vegnì legì en la Gronda Bretagna. La gasetta «The Times» speculescha ch’i fiss pussaivel, che betg la glina fetschia vegnir narra la carstgaunadad, mabain la glisch da la glina. Ed uschia fetschia da nov la glisch moderna da lampas, televisiuns e visurs vegnir nar umens e dunnas.
RR actualitad 11:00