Las ultimas emnas han las temperaturas miaivlas dominà. L'enviern pareva stgatschà. Questa fin d'emna dat l'enviern dentant in comeback, ed el resta in mument.
La notg sin dumengia possia dar naiv enfin en lieus pli bass. La gronda naiv vegnia dentant davent da glindesdi, ha Sabine Balmer dad SRF Meteo ditg ad RTR. Durant ils emprims dus dis da l'emna nova saja da quintar en il Grischun dal nord ed en il Grischun central cun fin a 60 centimeters naiv nova. En la Surselva possia perfin dar fin ad 80 centimeters naiv. Pli ruasseivel vegni ad esser en il sid. La èsi da quintar cun maximal 15 centimeters.
Atgnamain èsi fitg normal ch'i po anc naiver ina giada mez mars. Il spezial è simplamain ch'i è stà fitg miaivel las ultimas emnas.
Tenor prognosas actualas n'èsi era betg da quintar che la primavaira turna la segunda part da l'emna proxima. Era la mesemna e la gievgia restia frestg cun maximal 2 u 3 grads en la regiun da Cuira. Plinavant saja tenor Sabine Balmer era pussaivel ch'i dettia anc ina giada in zic naiv.