La notg sin glindesdi vers las 02:00 han nunenconuschents siglientà in bancomat a Vicosoprano en la Bregaglia. Quants daners ch'els han pudì engular na communitgescha la polizia betg, quai haja raschuns tacticas ha ditg la polizia chantunala a l'agentura da novitads Keystone-SDA. Pervi da la forza da l'explosiun, hai dà in donn material da plirs dieschmilli francs vi da l'edifizi.
La medema notg è vegnì engulà en il vitg vischin a Casaccia in cotschen Fiat Panda. Quest enguladitsch pudess avair in connex cun il cas da Vicosoprano.
Persunas che pon far indicaziuns tar in da quels dus delicts, èn suplitgads da s'annunziar tar la Polizia chantunala.