«Davent da l'entschatta dal vitg tochen la fin èsi ina colonna dad autos che sa mova el tempo da peduns», uschia descriva Reto Loepfe, president da vischnanca da Razén, il maletg che sa preschenta a la populaziun dal vitg cura ch' il traffic dal Gottard vegn svià sur il San Bernardino. La Polizia chantunala ed il chantun enconuschian quest problem.
La Polizia chantunala serra bain l'entrada a l'autostrada tar Panaduz, na serra dentant betg las sortidas.
Tras questa mesira na vegnian ils automobilists betg tegnids sin l'autostrada. Quai portia nagut, uschia Loepfe.
Bloccar sortidas - na betg ina buna opziun
Tras las annunzias da radio u el mender cas schizunt cun serrar las sortidas da l'autostrada emprovian ins da schliar il problem, explitgescha Markus Walser, pledader da medias da la Polizia chantunala. «Sche nus bloccain la sortida tar Panaduz, pertutga quai dentant er igl indigen che vul ir a Razén u Panaduz. Lez po allura er betg sortir.» La consequenza fiss che mintga singul automobilist stuess vegnir dumandà suenter sia destinaziun. Quai manass tar anc dapli colonnas ed anc pli gronds disturbis. Plinavant vegnian ils blers automobilists manads tras in apparat da navigaziun. Sin quai na haja la Polizia chantunala nagina influenza. «Sche nus dain atras ch'ina sortida e bloccada vegn igl automobilist a sortir pli baud.» Lura fissan anc daplirs vitgs pertutgads dal traffic da guntgida.
RR actualitad 11:00