Il Fashion Outlet a Landquart vegn engrondì. Enfin il 2026 duain 14 novas stizuns avair plaz sin 5000 ulteriurs meters quadrats. Entras quai vegnian stgaffidas 200 novas plazzas da lavur, sco ils responsabels scrivan. Ins haja tut las necessarias lubientschas da bajegiar.
Las novas stizuns vegnan bajegiadas sin l'areal nua che la chasa da parcar è ussa. En il sid da l'areal vegn bajegià in nov parcadi cun quatter auzadas. L'emprima etappa da bajegiar haja gia cumenzà, han las persunas responsablas scrit la gievgia en ina communicaziun.