A Langwies ha in chametg tutgà la notg sin mesemna ina chasa. La chasa haja lura cumenzà a brischar, scriva la Polizia chantunala. Ils pumpiers dad Arosa èn stads fatschentads pliras uras per stizzar l’incendi.
Las 23:30 han vischins clamà la polizia perquai ch’in chametg ha tutgà la chasa vischina. Els èn stads alarmads perquai ch’els hajan udì in tun dad aut. Curt suenter sajan las flommas vegnidas or dal tetg. Ils pumpiers dad Arosa èn stads al lieu cun 45 persunas, han stizzà il fieu e lura tegnì guardia fin la bun’ura. Cura ch’il fieu è rut ora n’èn naginas persunas u animals stads en la chasa.
