Siglir tar il cuntegn

Header

Navigaziun

cuntegn

Grischun «Las chavallas da trair» da las demos dal clima

En il cumbat cunter il clima croda si – tar las demonstraziuns a Cuira han las dunnas il commando, las giuvnas dunnas. Ellas organiseschan las chaumas dal clima, fan attent la giuventetgna sin la problematica e discutan schizunt cun la regenza grischuna davart la tematica.

I croda en egl che las dunnas surpiglian plitost la batgetta en il cumbat cunter il clima tar las demonstraziuns a Cuira. Las dunnas èn «las chavallas da trair» en quest moviment. Quai saja propi uschia, dentant na crain las activistas betg che la tematica interessia betg ils umens.

Igl è plitost ina casualitad che mo dunnas èn davanttiers tar il moviment da clima a Cuira.
Autur: Rosalina Müllerco-organisatura da las chaumas da clima a Cuira

Tuttina, ellas vegnian vinavant a cumbatter per lur giavischs e per lur interess. Ed en il futur san ellas s'imaginar dad era vegnir activas sin nivel politic, era gist sco represchentantas da lur gender:

Ch'i dat pli blers umens che dunnas en la politica disturba mai.
Autur: Sina Mennco-organisatura da las chaumas da clima a Cuira

Inscunter cun la regenza

Questa emna èn las trais giuvnas Sina Menn (18), Gianna Catrina (17) e Rosalina Müller (17) sa scuntradas cun ils cussegliers guvernativs Mario Cavigelli e Jon Domenic Parolini per discutar davart il clima. Sco il chantun scriva, vegnia la regenza ad empruvar da surpigliar giavischs da las activistas en il process politic.

Ellas vulan en general che las emissiuns da CO2 vegnian reducidas. Concret han las trais giuvnas proponì als cussegliers questas mesiras:

  • clamar or stadi da crisa dal clima
  • custs pli moderats per il traffic public
  • meglra sensibilisaziun dals giuvens per la tematica clima tras la scola

RR actualitad 17:00