Siglir tar il cuntegn

Header

audio
Suenter pausa da corona sto l'Uniun chantunala da musica dar gas
Or da Actualitad dals 04.04.2022.
abspielen. Laufzeit 3 minutas 21 Sekunden.
cuntegn

Las musicas suenter corona «Il pli impurtant è ch'ils uffants fetschian musica»

Uffants e giuvens musicants èn il garant per che las bunamain 100 musicas dal Grischun possian sunar er en l'avegnir. Tge fan las musicas da giuvenils suenter corona per gudagnar novs musicants? Ina presidenta ed in dirigent dattan pled e fatg.

La sonda passada èn sa radunads ils delegads da l’Uniun chantunala da musica dal Grischun a Lantsch. Uschia èn s’inscuntrads era ils represchentants da musicas giuvenilas. Gist l’enviern passà saja stà difficil, di Angelika Luzi, da la cumissiun da giuvenils. I haja dà demissiuns, ma percletg nagina musica che haja chalà.

Senza concerts - naginas novizas e novizs

Remo Derungs diregia la Musica giuvenila Lumnezia. La mancanza da concerts durant corona saja stada in problem. Per il solit cumenzian ils uffants a sunar cun 8 u 9 onns. Ma per gliez stoppian els avair udì avant las musicas als concerts, per savair, pertge ch’i dovra exercizis.

Ils pitschens audan al concert, co ch’ils fragliuns pli vegls sunan – e quai ha mancà.
Autur: Remo Derungs dirigent Musica giuvenila Lumnezia

I saja impurtant dad uss daventar activ, far demonstraziuns dad instruments e mussar che sunar è in lessig hobby, di Remo Derungs che ha studegià jazz e trumbetta e dat uras da musica. Corona haja però era insatge positiv: Numnadamain dapli anim en ils exercizis suenter questa lunga pausa.  

Curaschi per insatge nov

Angelika Luzi presidiescha la Jugendmusik Jenaz. Lezza emprova cun novas vias da gudagnar commembers. Uschia ha la musica fatg ses champ ensemen cun il chor d’uffants dal Partenz. In'autra idea fiss era dad integrar furmaziuns da musica populara.

Il pli impurtant èsi da dar vinavant la cultura, e che noss uffants fetschian insumma musica.
Autur: Angelika Luzi presidenta da la Jugendmusik Jenaz

In pass en lezza direcziun ha Angelika Luzi gia fatg. Sia musica è ina tipica brassband. Uss han els integrà intgins sufladers d’instruments da lain che han momentan nagina pussaivladad da sunar en il Partenz. Ella pledescha dad esser in pau pli curaschus ed empruvar ora chaussas.

RTR actualitad 06:00;

Artitgels legids il pli savens

Scrollar a sanestra Scrollar a dretga