«Las pretensiuns da la cultura èn ademplidas»

La cultura survegnia dapli daners l'onn proxim ed i vegnia elavurà in concept da cultura. Uschia sajan las pretensiuns dal comité ademplidas. Cun questa argumentaziun ha il Cussegl grond prendì enconuschientscha da la petiziun.

Maletgs pendì si en il Museum Segantini a San Murezzan. Bild in Lightbox öffnen.

Legenda da maletgs: Maletg simbolic: Museum Segantini a San Murezzan. Keystone

Avant in onn ha il comité inoltrà sia petiziun che pretenda dapli attenziun e dapli daners per la cultura grischuna. Il comité «Chantun da cultura Grischun» ha era organisà ina gronda festa per mussar la varietad da la lavur culturala en il Grischun.

Prender enconuschientscha u spetgar

Ina minoritad cun la deputada Sandra Locher Benguerel (PS) a la front ha fatg valair, ch'il concept da cultura ch'è vegnì decidì il favrer cun la revisiun da la lescha da cultura, na saja anc betg sin maisa. Perquai saja da spetgar e laschar pendenta la petiziun.

Il Cussegl grond ha dentant decidì auter ed ha prendì enconuschientscha da la petiziun, uschia sco quai che la presidenta da la cumissiun predeliberanta Cornelia Märchy-Caduff (PCD) aveva proponì. La decisiun è stada clera cun 85 cunter 32 vuschs.

«Nus essan cuntents, restain dentant activs»

Ella saja be in zic trumpada, ha ditg Jacqueline Giger Cahannes sin dumonda dad RTR. Lur comité haja cuntanschì bler – era sch'els avessan natiralmain gì pli gugent dapli daners, uschia la presidenta da la Filharmonia da chombra e suprastanta dal comité «Chantun da cultura Grischun», che ha persequità la debatta sin tribuna dal Cussegl grond.

Il comité veglia dentant vinavant observar la politica da cultura dal chantun Grischun e surtut era far part da la gruppa ch'elavura il concept sco fixà en la lescha da cultura il favrer .

RR actualitad 12.00