Per Raphael Hofmann è cler, tge ch’è la pli gronda sfida tar sia lavur: Eruir tut las persunas cun quellas ch'il infectà u l’infectada ha gì contact. Quai possia daventar ina vaira lavur da retschertga, di Raphael Hofmann.
La pli gronda sfida è d’eruir cun tgi che la persuna infectada ha tut giu contact.
Savens na sa regordian las persunas infectadas betg pli cun tgi exact, ch’ellas hajan gì contact. Uschia èn ils contact tracers fitg engraziaivels per persunas, che s’annunzian direct tar il center da contact, sch’ellas san, che lur collega ha Covid-19 ed els han gì contact cun el u ella. Quai fetschia la lavur bainquant pli simpla.
Contactar las persunas
Cura che las persunas, che ston ir en quarantina, èn eruidas vegnan ellas contactadas. En in emprim discurs da var 20 minutas vai per infurmar e sclerir dumondas:
Bleras persunas èn gia vegnidas infurmadas ordavant da l’infectà/l’infectada e coopereschan lura fitg bain.
Ma i dettia er il cuntrari, di Raphael Hofmann. Betg tuts chapeschian adina daco ch’els stoppian uss ir en quarantina e na vesian betg la seriusadad da la situaziun. Mo il bler possian els lura sclerir las discrepanzas cun in discurs.
Agid da la polizia
Be en fitg paucs cas stoppian els ordinar la quarantina atras la polizia. Quella u er auters uffizis, dastgian er ir sperasvi e controllar, sche las persunas sa tegnian vid la quarantina u betg.