Siglir tar il cuntegn

Header

cuntegn

Lavurar en il lontan Purschida da «Workaway» en il Grischun

Workaway – per rumantsch: lavurar davent da la patria. Ina purschida che vegn adina pli populara. Er en il Grischun. La famiglia Baselgia d'Alvaschagn porscha ina plazza per persunas ch'èn da viadi ed han gust da lavurar ed uschia sustegnair la famiglia en il mintgadi.

Ina nova experientscha

Benjamin è Basilais, ha 47 onns e fa gugent musica. Normalmain è el cuschinier per divers restaurants en Svizra. Avant passa in onn ha el dentant mess da la vart il scussal, ha pachetà il satgados ed è ì en il Portugal per lavurar tar in pur d'ulivas – sia emprima experientscha da lavurar en il ester.

audio
Famiglia Baselgia porscha plazzas per «Workaway»
ord Actualitad dals 23.01.2024. Maletg: RTR
laschar ir. Durada: 4 minutas 46 Secundas.

Oz lavura Benjamin tar la famiglia Baselgia ad Alvaschagn – in cas spezial: Normalmain vegn la famiglia sustegnida da persunas da l'entir mund: da l'Ungaria, da l'Oman u er da la Brasilia. In Svizzer è plitost ina excepziun. Benjamin è dentant sa decidì fitg sapientivamain per la vischnanca grischuna.

Jau vuleva star en Svizra – a mai plascha la natira e la quietezza d'Alvaschagn fitg.
Autur: Benjamin Sustegna la famiglia Baselgia en cuschina
Benjamin – der «Koch» der Familie Baselgia
Legenda: Benjamin – fin la fin favrer anc il cuschinier da la famiglia Baselgia. RTR

«Work & Travel» u er «Workaway»

Avrir la box Serrar la box

Work and Travel: il term englais descriva l'activitad, sch'ins va a viagiar e lavura il medem temp. Lavurs diversas tar famiglias u farmas, sco bajegiar, renovar u er cuschinar. Sco paja datti savens albiert e dunsena – u er paja en furma da raps. La purschida è fitg populara.

A la tschertga d'in sustegn per il mintgadi

Suenter la naschientscha dals schumellins han l'artist Mirko Baselgia e sia dunna tschertgà sustegn. Ina famiglia enconuschenta ch'ha da lez temp fatg in onn intermediar ha offrì agid. Suenter il temp cun la famiglia enconuschenta han ils Baselgias tschertgà vinavant sin ina plattafurma ch'intermediescha forzas da lavur.

Nus tschertgain ina persuna averta ch'ha plaschair vi dal cuschinar e vi da nossa moda da viver.
Autur: Mirko Baselgia ospitant
Mirko Baselgia – Künstler
Legenda: Mirko Baselgia RTR

Moda da vita filantropa

En chasa Baselgia, ina chasa da scola renovada, marscha adina insatge. Parents ed enconuschents che visitan, lavurants e lavurantas d'art, che lavuran vi dal project d'art il pli nov da Mirko Baselgia, uffants ed animals che curran enturn – in tohuwabohu.

Nus emprendain fitg gugent d'enconuscher nova glieud e culturas nunenconuschentas – tras quai pudain nus crescher.
Autur: Mirko Baselgia ospitant

Ensolver, gentar e tschaina

La rolla principala da Benjamin è cuschinar. Mintga di cuschina el ensolver, gentar e tschaina per ils Baselgias. A la famiglia è nutriment sanadaivel fitg impurtant. Els mangian vegan ed uschè organic sco pussaivel. Quella maniera da mangiar dovra dentant bler temp e veglia.

Grazia al sustegn da persunas sco Benjamin po la famiglia investir temp en autras chaussas. En art u l'educaziun dals uffants per exempel. Benjamin stat anc enfin la fin da favrer e sustegna la famiglia.

RTR actualitad 08:00

Artitgels legids il pli savens