La Regenza grischuna ha deliberà il sboz per ina nova Lescha per promover abitaziuns en il Grischun. Las cundiziuns d'abitar en il territori da muntogna duain vegnir meglieradas. Persunas e famiglias che vivan en relaziuns finanzialmain modestas duain survegnir contribuziuns per cumprar, construir u renovar abitaziuns.
Fin uss stevan a disposiziun 1,3 milliuns francs ad onn. Da nov sajan previs almain 2 e maximalmain 5 milliuns francs ad onn. La raschun per la nova lescha è che las abitaziuns èn vegnidas pli cheras e stgarsas ils ultims onns.
Dapli spazi da viver favuraivel
Plinavant duai la construcziun d'abitaziun da locaziun favuraivlas vegnir promovida entras purtaders d'abitaziuns d'utilitad publica. Purtader da chasas d'abitar ch'èn commember da las organisaziuns «Wohnen Schweiz» u «Wohnbaugenossenschaften Schweiz» pon survegnir credits da 15'000 fin 60'000 francs cun tschains reducids per construir abitaziuns cun spazi da viver favuraivel.