Ils uffizis civils en il Grischun n'han betg bleras annunzias per nozzas da pèrs da medema schlattaina. Ils proxims trais mais datti en noss chantun mo singulas nozzas da la «lètg per tuts». Sch'i dettia dumondas, lura saja quai per gronda part dumondas da transfurmaziun. Pèrs ch'avevan laschà registrar lur partenadi, laschan transfurmar quel en ina lètg.
Per far quai datti ina varianta «nun-festiva» ed ina varianta «festiva». Tar la varianta «nun-festiva» suttascriva il pèr il formular da transfurmaziun sin l'uffizi civil, e quai senza perditgas da matrimoni. En il rom festiv dovri duas perditgas da matrimoni e po era envidar giasts.
En l'entira Svizra plitost paucas dumondas
Era en ils auters chantuns na datti betg ina cursa per ils termins da nozzas da pèrs dal la medema schlattaina. Ed era en general èsi dapli dumondas da transfurmaziun dal stadi civil. Las pli bleras novas lètgs datti a Turitg. Per quest onn ha l'uffizi civil dal la citad da Turitg cudeschà sur 230 termins da nozzas da pèrs cun la medema schlattaina. La cumpart da novas lètgs da persunas cun la medema schlattaina è circa 10%.
Ils termins dal prim da fanadur 2022 – l'emprim di che la «lètg per tuts» vala – sajan stads cudeschads aifer curt temp. En la citad da Turitg maridan quel di 26 pèrs da la medema schlattaina. En general pon ins dir che la dumonda per la «lètg per tuts» è pli auta en regiuns urbanas ch'en regiuns champestras.
In lung viadi a la lescha
Gia daditg han gruppaziuns cumbattì per ils medems dretgs per tuts – uschia era per ina lètg per tuts. Dentant pir il 2013 ha in'iniziativa parlamentara gì success. L'autura da quella è la politicra verd-liberala da Berna Kathrin Bertschy. Cun inoltrar la proposta per la lètg per tuts n'avess ella dentant betg pensà ch'il process duria prest 10 onns. Ella è surstada ch'in intent uschè impurtant per ina societad ha duvrà uschè ditg. Dentant è il levgiament grond che la lètg per tuts era vegnida acceptada il 2021 e va ussa en vigur.
