Tar la Lia Rumantscha daventa Andreas Gabriel secretari general ad interim a partir dal prim da schaner 2023. La suprastanza da la Lia Rumantscha, sut il co-presidi dad Urezza Famos e Gianna Luzio, ha reglà la gestiun suenter la demissiun dal secretari general Diego Deplazes, scriva la Lia en ina communicaziun.
Secretari general ad interim
En vista al fatg ch’il post da la secretaria generala respectiv dal secretari general vegn a restar vacant plirs mais, ha la suprastanza numnà Andreas Gabriel sco secretari general ad interim. El è il substitut dal secretari general ed actualmain responsabel per la represchentanza dals interess ed ils affars publics. Ensemen cun la direcziun vegn Andreas Gabriel a segirar la gestiun operativa enfin ch’ina nova secretaria generala u in nov secretari general entra en uffizi.
Or da l'archiv
La fin october han las duas co-presidentas da la Lia Rumantscha annunzià ch'ellas veglian refurmar las structuras da l'organisaziun.
