Il program d'activitads pervesa accents surtut en trais spartas. En la sparta «cuminanza» prevesa in project per exempel da porscher tut las infurmaziuns necessarias en spezial davart il rumantsch a persunas che sa chasan danov en il territori rumantsch. En la sparta «interess» vai cunzunt per la sensibilisaziun sin il nivel communal, chantunal e federal - per exempel cun l'emna rumantscha. E part da la sparta «promoziun» fa tranter auter la digitalisaziun. Là è la strategia actualmain en elavuraziun. Il 2025 duain resultar emprims projects concrets.
Dapi la fin da l'onn passà è Ignacio Pérez Prat responsabel per la digitalisaziun tar la Lia Rumantscha. El smina ch'ins sa dumondia, pertge ch'i dovria in entir onn per scriver ina strategia. Quella via dovria in zic dapli temp, ma quella via valia tenor el dapli la paina. Quai na muntia dentant betg ch'els sajan en quella fasa mo vi da «paterlar». El saja vi da tractar dumondas concretas da la digitalisaziun, sco per exempel la finaziaziun.
Jau pudess schont metter ensemen in document da 50 paginas cun bellas graficas, diagrams e texts che na pertutgan nagin. Nus stuain dentant empruvar d'integrar divers partenaris e gruppas d'interess en la digitalisaziun.
La Lia Rumantscha fa actualmain ina transfurmaziun. Quai vesan ins per l'ina vi dal nov organigram e per l'autra vi dal fatg, ch'ella ha augmentà las plazzas per 200%. Igl è vegnì stgaffì ina nova plazza da mainaproject ed ina nova en la communicaziun. Tenor il secretari general, Markus Solinger, dessan tut las plazzas esser occupadas a partir dal settember, uschia ch'ins possia entschaiver a lavurar.
La Lia Rumantscha haja blers projects ch'els veglian realisar – e per quai dovria finanzas. E la finanziaziun na saja betg fatga cun ils raps ch'els survegnian dal chantun e da la Confederaziun. Era sch'ins discurria da la digitalisaziun discurrian ins magari da summas autas. Uschia ch'ins stoppia parter si ils projects e realisar quels tenor la finaziaziun che saja disponibla. In project concret che la Lia Rumantscha realisescha è per exempel la furmaziun a distanza che dess vegnir schlargiada. Quella dess vegnir offerta er ordaifer dal chantun Grischun per l'entira Svizra.
Presidi reelegì e preventiv puspè cumprais la GiuRu
Ultra da quai han las 39 delegadas e delegads reelegì las copresidentas Urezza Famos e Gianna Luzio per in’ulteriura perioda d'uffizi enfin il 2027. Er il preventiv ha la radunanza approvà che prevesa entradas ed expensas da radund 4,4 milliuns francs e cuntegna puspè la contribuziun da 15'000 francs a la GiuRu. Quella contribuziun era ils davos onns vegnida reducida ed il 2023 schizunt vegnida sistida. Lura n'eri betg anc cler, sche la GiuRu survivia insumma anc sco uniun.