«Lia Rumantscha duai betg investir en in cumbat politic»

Ils delegads da la Lia Rumantscha han deliberà la fin d'october 100'000 francs per il cumbat cunter l'iniziativa No Billag - l'iniziativa che vul abolir las taxas per radio e televisiun. Il deputà da la PPS Domenic Toutsch crititgescha quai – il deputà da la PS Jon Pult tegn cunter.

Il maletg mussa il deputà Domenic Toutsch en il Cussegl grond. Bild in Lightbox öffnen.

Legenda da maletgs: Domenic Toutsch crititgescha la Lia Rumantscha. RTR

A la radunanza da delegads da la Lia Rumantscha han pliras persunas exprimì lur quitads davart las consequenzas da l'iniziativa No Billag – surtut per la Rumantschia. Perquai ha la radunanza deliberà 100'000 francs per activitads cunter l'iniziativa che va en votaziun ils 4 da mars 2018.

Nagins daners per cumbats politics

Il deputà Domenic Toutsch (PPS) ha proponì da reducir per 20'000 francs la contribuziun ch'il chantun dat a la Lia Rumantscha. Tenor il budget chantunal 2018 è quai ina contribuziun da 500'000 francs.

«  Ina organisaziun che survegn daners dal chantun na duai betg s'engaschar finanzialmain en in cumbat da votaziun. »

Domenic Toutsch
Deputà PPS

El saja d'accord che la Lia Rumantscha s'engaschia per la lingua rumantscha ed era cunter l'iniziativa No Billag – dentant betg cun daners.

Tut auter il deputà Jon Pult (PS): Cunquai ch'ils 100'000 francs sajan ord in legat da la Lia Rumantscha, pia daners privats e betg publics, na saja quai nagin problem.

«  La Lia Rumantscha è obligada da s'engaschar per il rumantsch e cunquai era cunter No Billag. »

Jon Pult
Deputà PS

«Quai n'èn betg daners publics»

Il pledader da la Lia Rumantscha, Andreas Gabriel, ha sincerà envers RTR che la Lia Rumantscha n'impundia nagins daners publics per il cumbat cunter l'iniziativa No Billag. Ils 100'000 francs derivian ord in legat, dal qual che la suprastanza da la Lia possia disponer.

Il Cussegl grond ha refusà cleramain la proposta da Domenic Toutsch cun 91 cunter 13 vuschs.

RR actualitad 17.00