Cun il nov onn da scola ha era cumenzà il segund onn «Rumantsch a distanza». L’instrucziun online che fa part ad in project da pilot da la Lia Rumantscha ha dentant cumenzà cun in inscunter fisic. Uschia pon las 11 scolaras e scolars emprender d’enconuscher in l’auter meglier e dumondas tecnicas pon vegnir respundidas gist al lieu. Quest inscunter fisic è in’adattaziun ch’è vegnida fatga sin basa da las experientschas durant l’emprim onn.
Las scolaras ed ils scolars da las vischnancas grischunas da lingua tudestga pon tscherner dapi l’entschatta da l’onn da scola 2021/22 rumantsch sco rom facultativ instruì a distanza. La Lia Rumantscha ha lantschà in project da pilot correspundent per il stgalim superiur da la scola populara grischuna.
Rumantsch per l'entira Svizra
La purschida cumpiglia tut ils idioms e rumantsch grischun sin dus differents nivels d’emprender. Il project da la Lia sa drizza en in emprim pass a las scolas da lingua tudestga dal stgalim superiur en il chantun Grischun per il rom facultativ «terza lingua estra». L'instrucziun da lingua vegn cumplettada cun in'emna cumpacta en Surselva. Ils proxims onns duai la purschida vegnir extendida era sin las scolas dal stgalim superiur e las scolas medias en l’entira Svizra.
Co vinavant cun il project?
Il project da pilot «Rumantsch a distanza» cuzza anc in onn. Co ch’i va vinavant suenter cun il project è anc intschert – quai perquai che la Lia Rumantscha n’è en sasez betg responsabla per l’instrucziun. Tenor ella saja quai chaussa dal chantun.