Las sessiuns dal Cussegl grond èn gia ussa publicas. Tgi che vul, po persequitar las debattas sin la tribuna da la sala. Ussa vul il chantun emetter quellas via internet.
Cuntanscher dapli glieud via livestream
Cun in livestream ord la sala hajan dapli persunas access, uschia argumentescha la Conferenza dals presidents sia proposta, ch'ella suttametta al Cussegl grond en la sessiun da favrer. Gist per persunas ord las differentas valladas grischunas saja il viadi a Cuira magari (memia) lung. Il livestream vegniss emess sin la pagina d'internet dal chantun Grischun e duai vegnir realisà cun las cameras e microfons ch'èn gia endrizzads en la sala dal Cussegl grond.
Las sessiuns d'avrigl e da zercladur duain servir sco pilot per ils livestreams. L'emprim sto dentant il Cussegl grond approvar la proposta da la Conferenza dals presidents. Tenor la planisaziun actuala è la discussiun e decisiun previsa per ils 14 da favrer 2018.
Gia l'onn 2015 aveva Corsin Caviezel (PS/Cuira) inoltrà ina dumonda per emetter las debattas en ina furma moderna.
RR novitads 06.00