Enfin ch'ils tests tar ils giugaders suspectads n'èn betg evaluads, sa chatta l'entira equipa da l'EHC Cuira en ina situaziun intscherta. Entaifer l'equipa hajan ins entant quintà che baud u tard pudessia tutgar era insatgi dad els, raquinta Livio Roner. L'Engiadinais, ch'è sin questa stagiun turnà da l'EHC Arosa tar Cuira, ha pir gist puspè cumenzà cun il trenament – quai suenter ina fractura vid in pe.
Entaifer il stadion, sin e sper il glatsch, ed en las gardarobas, durant trenaments e gieus dal campiunadi vegnia sa tegnì minuzius vid ils concepts da protecziun severs. Ma mintga giugader e funcziunari sa muventia sper trenaments e gieus da hockey en ses ambient privat e da lavur. Livio Roner spera ch'ils tests sajan negativs, uschia che las prestaziuns sportivas domineschian en lur chaus e na ils quitads pervia da Covid-19.