Il luf è fitg derasà en il Grischun ed en Svizra. Per savair nua ch'el sa chatta exactamain, datti il monitoring da lufs. Sper il monitoring visual cun observaziuns, datti er ina metoda acustica: la registraziun da ramurs dals lufs, sco ch'il schurnal regiunal da radio SRF rapporta. Il biolog d'animals selvadis e docent per sciencias applitgadas a la Scola aulta a Turitg Stefan Suter ha sia atgna metoda dal monitoring acustic e registrescha las ramurs dals lufs cun in microfon special.
Ils lufs communitgeschan in cun l'auter cun urlar. E questas ramurs pudain nus registrar cun noss apparats.
Per che l'apparat registreschia mo l'urlim da lufs e betg anc autras ramurs, stoppian ins anc lavurar vi dal sistem. L'informaticher e student da tecnica Olivier Stähli tschertga soluziuns. Per exempel duain las battarias tegnair pli ditg ed er il radius d'acziun dals apparats duai vegnir bler pli grond, uschia ch'i na dovra betg tants apparats.
En il Grischun n'han ins anc betg applitgà savens questa metoda. Tenor Arno Puorger da l'Uffizi da chatscha saja il monitoring dals lufs en general difficil, perquai che lufs na sajan betg adina dapertut e na possian uschia betg adina vegnir registrads.
Ils lufs occupan fitg gronds territoris ed ins duvrass fitg blers apparats per als registrar.
La metoda acustica na possia dentant betg remplazzar las observaziuns e las traplas fotograficas, di Arno Puorger. Cun in svilup tecnic dettia dentant in grond potenzial per registrar tuns.
