Suenter che l'emettur da GPS aveva chalà da transmetter signals, ha la polizia ungaraisa cumenzà sias investigaziuns. Entant ha quella chattà ora ch'in buob da nov onns ha probablamain mazzà il luf en accumpagnament d'in creschì, rapporta l'emettur da televisiun statal MTV. Suenter mazzar l'animal è l'emettur vegnì allontanà dal cadaver e bittà en in flum. Là ha la polizia chattà cun agid da sfunsaders l'emettur. Dal cadaver na datti nagins fastizs. L'entschatta avust ha la polizia lura arrestà dus suspectads, in da quels saja il bab e l'auter l'um ch'ha accumpagnà l'uffant. Ad els vegn renfatschà d'avair cuntrafatg a la lescha da protecziun da la natira e pereclitaziun da minorens. Il buob n'è tenor dretg ungarais betg da maiorennitad penala.
Il luf e protegì en l'Ungaria en moda stricta. Arno Puorger da l'Uffizi da chatscha dal Grischun ha ditg la primavaira envers l'agentura da novitads Keystone-SDA:«Nus avain deplorablamain supponì ch’il luf pudess esser mort».
Il mastgel dal triep da Stagias aveva fatg en gnanc 10 mais 1'927 km – el è viagià davent da Mustér fin en l'Ungaria. Quai han ins pudì observar grazia a l'emettur da GPS. E quest viadi ha procurà per bler attenziun mediala. Las grondas gasettas svizras han rapportà sur dal lung viadi.
Schizunt d'in record europeic ha il post spezialisà per animals da rapina KORA tschantschà. Anc mai hajan ins mesirà in viadi pli lung.
M237 ha fatg stops en pliras regiuns da metropolas sco la carta mussa. Mintgatant haja el fatg in paus per in'emna. Per guntgir a la citad da Budapest ha el duvrà bunamain in mais. Sin sia via n'ha el betg mo traversà autostradas e flums, ubain er in culm da 3'500 meters autezza, scriva il KORA.
Lufs giuvens bandunan lur trieps en la vegliadetgna da 1 fin a 3 onns, uschia er M237. Els tschertgan in nov territori da chatscha ed auters lufs, per fundar u s'associar cun in nov triep. Per gliez fan els per part fitg lungs viadis, fin uss han ins savì per exempel d'in luf da la Germania ch'è emigrà fin en il Belaruss (1'550 km).
