Siglir tar il cuntegn

Header

video
Mancanza da scolasts en il Grischun
Or da Telesguard dals 23.06.2022.
laschar ir. Durada: 2 minutas 44 Secundas.
cuntegn

Magistraglia dal Grischun Nagina mancanza «quantitativa», dentant ina «qualitativa»

En il Grischun instrueschian memia blera magistraglia sin in stgalim ubain en ina funcziun, ch'els na sajan betg qualifitgads. Quai crititgescha l'uniun per magistraglia. Il chantun stoppia reagir.

L'impuls per quella critica da l'uniun da magistraglia ha il minister d'educaziun Jon Domenic Parolini dà en l'ultima sessiun. Sin dumonda da la deputada Cornelia Märchy-Caduff che vuleva savair, sche er il Grischun haja da cumbatter sco ils auters chantuns da la Svizra cun ina mancanza da magistraglia ha el respundì, che la situaziun en il Grischun saja buna, e che tut las scolas hajan chattà magistraglia per il proxim onn da scola.

audio
Laura Lutz davart memia paucas persunas cun qualificaziun
ord Actualitad dals 27.06.2022.
laschar ir. Durada: 2 minutas 27 Secundas.

Quella resposta ha dentant vilentà l'uniun da magistraglia dal Grischun.

Nus n'avain forsa anc betg ina mancanza quantitativa da magistras e magisters, dentant ina mancanza qualitativa
Autur: Laura Lutz la presidenta da l'uniun da magistras e magisters

Il problem saja, che bleras persunas instrueschian cun in permiss spezial sin in stgalim ch'els n'hajan betg fatg il diplom. Els èn bain er pedagogs, dentant «in scolast primar n'ha betg la medema qualificaziun per instruir ina scola secundara sco in scolast secundar che ha in'autra savida dal fatg sco er experientscha co ir enturn cun giuvenils», agiunta Lutz.

Nagut nov

Quai problem na saja nagut nov, di Chantal Marti-Müller, la manadra da l'Uffizi per la scola populara ed il sport. Quest onn hajan radund 300 persunas survegnì in tal permiss per instruir, ina cifra ch'è en il rom dals ultims onns. Cunzunt tar il stgalim superiur e tar la pedagogia curativa sa repetia il problem adina puspè.

audio
Tge di il chantun dal problem?
ord Actualitad dals 27.06.2022.
laschar ir. Durada: 2 minutas 51 Secundas.
Cler vulain nus er scolastas e scolasts che han la qualificaziun, dentant sche nus n'anflain nagin dovran las scolas ina schliaziun
Autur: Chantal Marti-Müller manadra da l'Uffizi per la scola populara ed il sport

Ella relativescha dentant er la cifra: 75% da quellas lubientschas sajan be per pensums pitschens. Ed: «I dovra er mintga onn ina nova lubientscha, quella vala pia be per in curt temps en cass che la scola chatta ina persuna scolada gist.»

Problem vegn en il futur mender

Anc na saja il dumber da magistraglia betg in problem en il Grischun sco en blers auters chantuns da la Svizra, dentant la situaziun sa midia bainbaud: Lura, cura che tut ils babyboomers van en pensiun. Perquai haja il chantun d'agir uss, e betg pir cura che las scolas na chattan naginas scolastas e nagins scolasts, di Laura Lutz. «Nus stuain far la professiun da dar scola pli attractiva e procurar, che quels che fan la furmaziun da scolasta ubain scolast restian er en il Grischun.»

Quai giaja be communablamain, di Chantal Marti-Müller, sche tant il chantun sco er las vischnancas, la scol'auta pedagogica sco er las scolastas ed ils scolasts sez megliereschian l'image da la professiun: «Ins sto puspè mussar tge ch'è bel vid l'esser scolasta e scolas, quai manca in zic. Ins vesa mo ils problems e dasperas è quai uschè ina bella professiun.»

Il facit pia: Cumpareglià cun il rest da la Svizra ha il chantun Grischun anc avunda scolastas e scolasts, er sche betg tuts cun ils diploms necessaris, dentant en il futur pudess quai vegnir stretg, sch'il chantun, las vischnancas e las scolas na fan betg lur pensums da chasa.

RTR actualitad 12:00

Artitgels legids il pli savens

Scrollar a sanestra Scrollar a dretga