A Maiavilla èn tschintg persunas sa blessadas en in accident da traffic – duas dad ellas grevamain. Quellas duas èn vegnidas sguladas en ospitals a Turitg e Son Gagl, las persunas main grev blessadas èn vegnidas transportadas en ospitals a Schiers, Cuira e Grabs. Sco la Polizia chantunala scriva, saja in auto ed in auto da furniziun collidads frontalmain la sonda en damaun.
Omadus vehichels sajan vegnids schlavazzads da la via e restads a l’ur dal guaud, cumplettamain donnegiads. L’auto cun trais persunas a bord era en viadi dal Sankt Lutzisteig vers Maiavilla, cura ch’el è collidà cun l’auter vehichel. Daco n’è anc betg cler. Pervi da l’accident è la via restada serrada per var trais uras. 25 pumpiers, trais ambulanzas e dus helicopters èn stads en acziun.