Las mesiras da sustegn pervia da la pandemia paran d'avair effect – sin l'emprima egliada. En il Grischun èn l'onn passà 45% damain interpresas stadas insolventas, quai cumpareglià cun l'onn 2019. Guardà sur l'entira Svizra è il dumber da las firmas insolventas sa reducì per 19%. Quai mussa la statistica dal servetsch d'infurmaziun per l'economia Bisnode.
Il pli fitg è la quota sa reducida en la Bassa (-25%), suandà dal Tessin (-23%) e la Svizra dal Sidvest (-22%). Silsuenter suonda la Svizra Orientala (-20%), Turitg (-18%) e la Svizra Centrala (-16%).
Sustegn finanzial ha manà a fatschentas da zombie
En consequenza da la crisa da corona avessan ins spetgà che dapli fatschentas ston deponer la bilantscha, e betg pli paucas. La raschun ch'il cuntrari saja daventà realitad sajan uschenumnadas fatschentas da zombie. I sa tracta da talas fatschentas ch'avessan atgnamain stuì deponer la bilantscha, sch'i n'avess dà nagina crisa da corona ed uschia er nagin sustegn dal stadi. Grazia al sustegn finanzial hajan numerusas fatschentas pudì exister vinavant.
Però para la situaziun da sa midar en il futur. Betg sulet talas fatschentas da zombie, mabain er auters manaschis oraifer pertutgads da la crisa stoppian cartaivel deponer bainbaud la bilantscha, scrivan ils auturs dal studi.
