En il depot da buttiglias da vin da la viticultura Ladina Obrecht hai actualmain anc avunda buttiglias – quellas ston dentant era tanscher almain enfin l'avust. Gia il schaner hai dà ina mancanza da buttiglias ed ils Obrechts han gì da spetgar cun emplenir las buttiglias cun il vin che fiss stà pront. Per evitar che quai capitia danovamain han els empustà gist plirs camiuns plain buttiglias – per in pretsch ch'è stà 15% pli aut che usità.
La Vetropack SA – ina da las grondas producentas da vaider en l'Europa – cun sedia principala a Bülach di, ch'ella producescha medem bler products da vaider sco adina. Suenter la pandemia saja la dumonda per ils products dentant stada bler pli gronda – quai ch'haja chaschunà ina emprima mancanza da buttiglias. Tras quella mancanza hajan lura blers clients e clientas empustà en reserva – e da reagir uschè spert sin quel boom dad empustaziuns na saja betg pussaivel cunquai che la producziun da vaider saja ina producziun plauna.
Ch'ils pretschs sajan pli auts n'haja dentant da far nagut cun la dumonda ch'è pli gronda – mabain cun la guerra en l'Ucraina che haja auzà ils pretschs d'energia, ch'èn in factur decisiv tar ils pretschs da lur products. 80% dals custs da la Vetropack SA èn custs d'energia.
Cunquai ch'ils pretschs da gas èn actualmain uschè chars vegn er il product pli chars.
La viticultura Ladina Obrecht resta tuttina da buna speranza che la situaziun sa normaliseschia bainbaud puspè e ch'ella saja mitschada cun ina noda.